දරුවෙකුගේ ජිවිතයට පියෙකුගෙන් ලැබෙන දායකත්වය මිල කළ නොහැක්කකි. මුල් ළමාවිය සත්කාරය හා සංවර්ධනය සඳහා පියෙකුගේ දායකත්වය ලෙස කාන්තා සවිබලකරණය, හිංසා කිරීම වැළැක්වීම, නිවෙස තුළ සිදු කරන කටයුතු හා දරුවන් හදා වඩා ගැනීමේදී දක්වන සහයෝගය, ප්‍රජනන සෞඛ්‍ය කටයුතුවලදී දෙදෙනා එක්ව තීරණ ගැනීම, ලිංගික සම්ප්‍රේෂණ රෝග වැළැක්වීමට කටයුතු කිරීම, කාන්තාවන්ගේ හා දරුවන්ගේ සෞඛ්‍ය හා පෝෂණ්‍ය රැකගැනීම උදෙසා දක්වන දායකත්වය යන කරුණු ඉතා වැදගත් වනු ඇත. දරු සත්කාරයේදී පුරුෂ පාර්ශවය එනම් පියවරු සම්බන්ධ වීම තුලින් වඩාත් හිතකර ප්‍රතිඵල දැකිය හැකි බව ඇද වන විට පර්යේෂණවලින් පවා සනාථ කර ඇත. දරුවෙකුගේ ජීවිතයේ මුල් කාලයේ පියා ඔවුන් සමග වැඩි වශයෙන් අන්තර් සබඳතා ඇති කරගැනීම නිසා එවැනි දායකත්වයක් නොදක්වන පියවරුන්ගේ දරුවන්ට වඩා ඉහළ බුද්ධි ඵලයක් උරුම කරගැනීමට එම දරුවන් සමත් වී ඇත. දරුවන්ගේ මුල්ම දෙගුරුන් වනුයේ තම මව්පියන් බව සතුටින් හා ආදරයෙන් අවබෝධ කරගැනීමට දෙමාපියන්ට ඉඩ සැලසිය යුතුය. ළමා උත්තේජන සඳහා ශක්තිමත් වූ පරිසරයේ පවතින අවස්ථා හා ද්‍රව්‍ය හඳුනා ගැනීමට පියවරු සමත් විය යුතුය. වචනයෙන් මෙන්ම ක්‍රියාවන් මගින්ද ඔවුන් දරුවන් සමග අන්තර් ක්‍රියාවන්හි යෙදිය හැක. දරුවන් තුළ කුතුහලය, නිරීක්‍ෂණය, සිතින් මවා ගැනීම, නිර්මාණාත්මක ක්‍රියාකාරකම් ඇති කිරීම පියවරුන්ට කළ හැක.
ඔබ සාර්ථක පියෙක් නම් මේ ලක්ෂණ ඔබ තුළත් ඇති
- ආරක්‍ෂිත බව
හොඳ පියෙකු පැහැදිලි සීමාවක් තුළ දරුවන් වඩා කැමති දේ පිළිබඳව උනන්දු වේ. වැරදි තේරීම් සිදු වන විට ඒ බව පැහැදිලි කරදෙමින් ක්‍රම ක්‍රමයෙන් චරිත සංවර්ධනයට දායක වේ.
- සෙනෙහස
මව සිදු කරන ආකාරයට දරුවා සිප වැළඳ ගනී. ඔහුගේ සෙනෙහස මව් සෙනෙහසට අඩු නොවේ.
- විශ්වාසනීයත්වය හා සුරක්‍ෂිතභාවය
තම පියා නිරන්තරයෙන් නිවැරදි බව විශ්වාස කරයි. ඔහු කිසිදා බොරු නොකියන බව දරුවාගේ හැඟීමයි. ඔහු කිසිදිනක විශ්වාසය කඩ නොකරයි. ඔහු කිසිදා දුෂ්කරතාවයකදී දරුවන් හැර නොයයි. මෙම විශ්වාසය දරුවා තුළ හොඳ පියෙකු ගොඩනැංවීමට ඉවහල් වේ.
- උද්යෝගී බව
පියා සෑම විටම දරුවාගේ උත්සහාය, උද්යෝගයේ මූලාරම්භයයි. පාපන්දු තරගයකදී, විවාද තරගයකදී එම ස්ථානයට පියා පැමිණීම උසස් කොට සලකයි. විශ්වාසනීයත්වය ඇති කරයි. ඔවුන්ගේ ජයග්‍රහණයකද වඩාත්ම සතුටුවන පුද්ගලයා පියා වන අතර ඔවුන්ගේ අසමත් වීමකදී වඩාත් දුක්වන කෙනාද ඔහු වේ. පියාගේ වචන දරුවාට වෙනම ලෝකයක් තනා දෙයි. එසේම එම වචන දරුවා ඇති කිරීමට මෙන්ම කඩා වැටීමටද හේතුවක් වේ.
- ඇහුම්කන් දීම
පියා කාලයක් ගත කර දරුවාට ඇහුම්කන් දෙයි. දරුවාට නොබෙදුන අවධානයක් ලබාදේ. ඔවුන්ගේ දෘෂ්ටිකෝණය පිළිබඳව යමක් තේරුම් ගැනීමට උත්සහ කරයි.
- ජීවිතයේ අවශ්‍යතා ඉටුකරදීම
පවුලේ මූලිකයා ලෙස දරුවන්ට විටින් විට අවශ්‍ය වන ආහාර, නිවාස, අධ්‍යාපනය, ආරක්‍ෂාව අවධානය ලබාදීමට බැඳී සිටී
- මවට හා දරුවන්ට ගරු කිරීම
දරුවා තම මව්පියන් එකතු වී වැඩ කරන ආකාරය දකින අතර හොඳින් එය ඉගෙන ගනී. හොඳ පියෙකු තම දරුවාට මවට ගරු කරන ආකාරය උගන්වයි. එය ක්‍රියාවෙන් කර පෙන්වයි. තම සහකාරියට ගරු කිරීම මඟින් දරුවන් ඉදිරියේ ඇයගේ අදහස්වලට ගරු කරන අතර කිසි දිනක ඇය සමඟ තර්ක නොකරයි. මෙම නිවැරදි පණිවිඩය දරුවාට ලැබේ. තම මාපියන් එකට එක්ව වැඩකරන බව හා දෙදෙනාටම සමානව ගරු කල යුතු බව ඔහු/ඇය අවබෝධ කරගනී.
- දරුවන් සමඟ විනෝදයෙන් කාලය ගත කිරීම
පියා ගෙදරසිටින විට එම දරුවන්ට එය විනෝදාත්මක කාලයක් වනු ඇත. ඔහු දරුවන් සමඟ සෙල්ලම් කරයි. උපායශීලී කෙටි ක්‍රම උගන්වයි. නිවසේ කටයුතු විනෝදජනක ලෙස කල හැක. රූපවාහිනිය, ලැප්ටොප්, දුරකථන තුල දරුවා රැඳී නොසිටිනු ඇත.
- පියා හොඳ ගුරුවරයෙකි.
පියා අධ්‍යාපනික පැත්තටත් වඩා ජීවිතය පිළිබඳව පාඩම් කියා දෙයි. අසමත්වීමකදී හෝ බලාපොරොත්තු කඩවීමකදී ඊට මුහුණදෙන ආකාරය කියා දෙයි. ඔවුන්ගේ හැකියාවන්, ශක්තීන් හොඳ දේවල් සඳහා භාවිත කිරීමට හැකි බව උගන්වයි.
මව මෙන්ම පියාගේ දායකත්වය දරුවාගේ සත්කාර ක්‍රියාකාරකම්වලට එක්ව නිරතවීම තුලින් මෙම විවිධ අවශ්‍යතා සපුරාලීම පහසුවෙන් සිදුකල හැකිය. එමඟින් යහපත් වූ ළමා සංවර්ධනයක් ඇති වනු නොඅනුමානය.
කුරුණෑගල, පළාත් මහා රෝහලේ නොමේරු ළදරු දැඩි සත්කාර ඒකකයේ සූතිකා පුහුණු හෙද නිලධාරිනි (1 ශ්‍රේණිය) ක්‍රිෂාන්ති ගංගා කුමාරිහාමි මහත්මියගේ ලිපියකි.
