දරුවාගේ උපන්දිනය මේ විදිහට ගනිමුද ?

birthday_celebration_child

දරුවෙකුගේ උපත කියන්නේ නිවසට මහත් සම්පතක්. මේ නිසා හැම දෙමව්පියෙක්ම දරුවාගේ උපන්දිනය තම තමන්ගේ ශක්තියේ ප්‍රමාණයෙන් සමරනු ලබනවා. එහෙම නොකරනවා නම් එයත් ලොකු වැරැද්දක්. එහෙම කියන්නේ ඇයි කියනවා නම් දරුවා ගැන පවුලේ උදවිය තුල කිසියම් පිලිගැනීමක් තිබෙනවාය යන අදහස දරුවාට ඇති වෙන්නේ එවිටයි. එහෙම නම් මේ උපන්දිනය අපි සමරන්නේ කොහොමද ? ….

  • ආගමික ආශිර්වාදයට මුලින්ම යොමු වෙන්න
    ඔබ කුමන ආගමක වුනත් ඔබ අදහන ආගමට අනුව ආශිර්වාදය සලසන යම් යම් පිලිවෙත් තිබෙනවා. දරුවාගේ උපන්දිනය මුල් කර ගෙන මුලින්ම එවැනි පිලිවෙත් වෙනුවෙන් යොමු වෙන්න. එය ඉතාම වැදගත්. දරුවාට ඒ නිසා ආහිර්වාදයක් ඇති වෙන අතරම එයින් ඔහුගේ ජීවිතයේ ශක්තිය ගොඩ නැගෙන වාතාවරනයක් නිර්මානය වෙනු ඇත.
  • උත්සවය සංවිධානය ගැන දරුවා සමග සාකච්ඡා කරන්න
    ඔබේ දරුවා යම් වයස මට්ටමක සිටිනවා නම් උපන්දිනය සංවිධානය කිරීමේ අයිතිය ඔහුට දෙන්න. ඒ වෙනුවෙන් ඔහුගේ අදහස් විමසා සිටින්න. එවිට තමාගේ අවශ්‍යතාවය අනුව උපන්දිනයේ සැලසුම ඔවුන්ම ඉදිරිපත් කරනු ඇත.එතකොට තමා වැදගත් අයෙක් බව දරුවාටත් හිතෙන්නේ ඔවුන්ගේ අදහස් ගැනත් දෙමව්පියන් විමසන නිසාය.
  • තමන්ගේ ශක්තිය ගැනත් හිතන්න
    ඔබ දරුවාගේ උපන්දිනය සමරනු ලැබිය යුත්තේ අල්ලපු ගෙදර දරුවාගේ උපන්දිනයට හෝ කාර්යාලයේ මිතුරන්ගේ දරුවන් විසින් උපන්දින සමරනු ලැබූ ආකාරයට නොවේ. අද බොහෝ දෙනා අවන්හල්වල උපන්දින සමරන අවස්ථා ඇත. ඒ වෙනුවෙන් එක් පුද්ගලයෙක් වෙනුවෙන් විශාල වැය බරක් දරන්නට සිදු වේ. මේ නිසා එය අනවශ්‍ය නොව ඔබට දරන්නට හැකියාවක් නොමැත්තේ නම් ආර්ථික ලෙසින් අපහසුතාවයට පත් නොවී ඔබේ හැකියාව අනුව උපන්දිනය සංවිධානය කර ගත යුතු බව දරුවාටත් දන්වා සිටින්න.
  • උත්සවය සංවිධානය කිරීම
    උත්සව සංවිධානයේදී වර්ණ තේමාවක් වගේම ඇ‍ඳුම ගැන තේමාවක් ගොඩ නගා ගැනීම අද සිදු වෙන සාමාන්‍ය තත්වයක්. මේ තත්වයේ උපන්දින අවශ්‍යම නැහැ. ඒත් ඔබ ගේ ආර්තික හැකියාව අනුව සංවිධානය කරන පිලිවෙල අනුව මේ අන්දමේ සැලසුම් ගොඩ නගා ගැනීමට බාධාවක් නැත. ඒ අතරම මේ මතක සිහිවටන ඡායාරූප හෝ වීඩියෝ කිරීමට අමතක කරන්න එපා. යම් දවසක දරුවාට තමාගේ උපන්දින සැමරුම වෙනුවෙන් වූ මතකයේ ඉතිරි වෙන්නේ මෙම ඡායාරූප පමණි.
  • විඩියෝ නරකද ?
    වීඩියේ කිරීම සාමාන්‍යයෙන් සිද්ධ වුනත් අපි මේ දර්ශන මුලදී නිතර නිතර නරඹා සිටියත් කාලය සමග එය නොදැනම අමතක වෙනවා. මේ වෙනුවෙන් කාලය අවශ්‍යයි.ඒ වෙනුවෙන් උපාංග ක්‍රියාත්මක කිරීම අවශ්‍යයි. කාලය සමග මේ විඩියෝ දර්ශන අක්‍රීය වීමත් සිද්ධ වෙනවා. ඒ නිසා නිතරම විඩියෝ කරනවා වගේම මතක සිහිවටන ලෙසින් ඡායාරූප සංරක්ෂනය කොට තබා ගැනීම ඉතාම වැදගත්.
  • උපන් දිනය උත්සවයේ විවිධාංග
    උපන්දින උත්සවයේ ආහාරපාන පමණක් නොව බෙහෙවින් විචිත්‍ර අංග ඇතුලත් වීම ඉතාම වැදගත්. ගීත ගායනාවන්, සංගීත පුටු තරග, වෙනත් විනෝද අවස්තාවන් මගින් දරුවාට වින්දනයක් ලබා දීම ඉතාම වැදගත්. ඒ නිසා උත්සවය සංවිධානය කිරීමේදී මෙම ඉසව් ගැනත් අවධානය දක්වන්න.
  • තෑගි බෝග දෙන විට
    උපන්දිනය වෙනුවෙන් දරුවාට තෑගි බෝග ලබා දෙන විට ඔහුගේ අවශ්‍යතාවය ගැන හිතන්න.ඒ වගේම රුචිකත්වය ගැනත් අවබෝධයක් තිබීම ඉතා වැදගත් වේ. ලැබෙන ත්‍යාගයෙන් දරුවාට සතුටක් ලැබෙනවා නම් එය ඉතාම වැදත් වෙනවා
  • අර්ථවත් තෑගි මොනවාද ?
    දරුවාගේ උපන්දිනය සමරන විට ලබා දෙන ත්‍යාගයන්ට අමතරව එම දිනය මුල් කර ගෙන පැලයක් රෝපනය කරන්න. දරුවා වාගේම මේ පැලයත් ඔබ පෝෂණය කරමින් දරුවාද ඒ කටයුත්තට සම්බන්ධ කර ගන්න. ගස මල් පළ දරන විට දරුවාටත් එයින් ලැබෙන සතුට අසීමිතය. ඒ වගේම පරිසරය ආරක්සා කිරීම වෙනුවෙන් දරුවාගෙන් ලැබෙන සහයෝගය නොදැනීම ඔබට ලැබෙනවා පමණක් නොව ඔහු පරිසර සංවේදී දරුවෙක් ලෙසින් සමාජගත වෙනු ඇත.
  • පොතක් පතක් නරකද ?
    අද දරුවන් මුල් කර ගෙන නැගෙන චෝදනාව වන්නේ කියවීමට උනන්දුවක් නැති බවත් ඒ නිසාම බාහිර දේ ගැන ඇති දැනුම ඉතාම අල්ප බවත්ය. මේ නිසා පොත පත වෙනුවෙන් ඇල්ම සහ රුචිය බාල කාලයේ පටන්ම වගා කළ යුතුය. ඒ වෙනුවෙන් ඇති හොඳම අවස්ථාව උපන්දිනයයි. දරුවාට ලබා දෙන සෙසු තෑගි බෝග අතරටම අලංකාර පොතක් තෑගි කරන්න. උපන්දින තෑගි ඉතා සතුටින් පරිශීලනය කරන විට මේ පොත් පත් වෙනුවෙන් ඔහුගේ මනස නොදැනම යොමු වෙන නිසා කියවීමේ රුචිය නොදැනම වගා වෙනු ඇත.
  • පැමිණෙන දරුවන්ටත් තෑගි
    අද ඇතැම් උපන්දින උත්සවයන්හිදී පැමිනෙන දරුවන්ටත් රස කැවිලි වලින් සංග්‍රහ කිරීමත් සමග පුංචි තෑග්ගක් ලබා දෙන අවස්ථා ඇත.පංතියේ දරුවන්ටත් මේ විදිහටම පුංචි තෑග්ගක් විදිහට පොතක්, පැන්සලක් හෝ වෙනත් ඉගෙනුමට අවශ්‍ය පුංචි තිලිනයක් පිරිනැමීමෙන් පැමිනෙන දරුවන්ටත් සතුටක් ඇති වේ.
SHARE
හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY