- Advertisement -

ළදරුවන්ගේ නින්ද ගැන මව්වරුන් දැනුවත් විය යුතු කරුණු ගැන ඔබ දන්නවාද?

-

අලුත උපන් දරුවෙකුට නින්ද අත්‍යවශ්‍ය වන අතරම දරුවාගේ මොළයෙහි වර්ධනයට දරුවාගේ නින්ද බලපාන බව කියවේ. එමෙන්ම සෑම දරුවෙකුටම නිදාගැනීමේ රටාවක් පවතී. ළදරුවා ඉපදී මුල් කාලයේදී දිනකට පැය 16-17 ක් පමණ නිදාගනී. සමහර දරුවන් වැඩිපුර වේලාවක් රාත්‍රියට නිදාගන්නා අතර සමහර දරුවන් රාත්‍රී ඇහැරගෙන සිටිමින් දහවල් කාලයේදී නිදාගනියි.

ඔබ මවක් ලෙස දරුවා නින්දට යැවීමේදී දරුවා සමග කතා කරමින් කවි කියමින් හොඳ නින්දක් ලබාගැනීමට අවශ්‍ය වටපිටාව සකස් කළ යුතුයි. දරුවාට නිදහසේ ප්‍රතිචාර දැක්වීමට අවස්ථාව ලබාදීමත්, නිදහසේ ප්‍රතිචාර දැක්වීමට හුරු කිරීමත් ඉතා වැදගත් වේ.

- Advertisement -
දරුවාට හොඳ නින්දක් ලබාදීම

ළදරුවාට මව්කිරි ලබාදෙන මුල් මාස 6 තුළ දරුවාට සුදුසුම ස්ථානය කාමරයයි. සාමාන්‍යයෙන් දරුවෙකු මවගේ හෝ පියාගේ තුරුලේ නිදා ගැනීමට වැඩි කැමැත්තක් දක්වයි. දරුවාට ඔබේ උණුසුම අවැසි බව සැබෑවකි, නමුත් නිරන්තරයෙන් එය සිදු කිරීම දරුවාට මෙන්ම ඔබටද කරගනු ලබන හානියක් වේ. මන්ද ඔබේ කටයුතු කර ගැනීමට අවශ්‍ය කාලය වැය වනවා සේම ඔබ දරුවාගේ තුරුලෙන් ඉවත් වන විට දරුවාද අඩ නින්දෙන් ඇහැරීමට ඉඩ ඇති බැවිනි. මේ නිසා දරුවාට හොඳ නින්දක් නොලැඛෙන අතර දරුවාට තනිවම නිදා ගැනීමට හුරුවක්ද නැතිවී යයි. එබැවින් කිරි දීමෙන් අනතුරුව දරුවා ඇද මත හෝ තොටිල්ල මත තැබීමෙන් දරුවා තනිව නිදා ගැනීමට හුරු වේ.

දරුවාට නිසි වේලාවට නින්ද හුරු වීම

දහවල සහ රාත්‍රිය අතර වෙනස දරුවාට හඳුන්වාදිය යුතු අතර රාත්‍රි කාලය නින්ද සඳහා වෙන්වන බව දරුවාට වටහා ගැනීමට හැකි අයුරින් ක්‍රියා කළ යුතුයි.

දහවල් කාලයේදී,

  • ඔබේ සාමාන්‍ය කටයුතු මෙන්ම නිවසේද වැඩ කටයුතු ද සුපුරුදු ආකාරයට සිදු කරන්න
  • සුපුරුදු පරිදිම ශබ්ද නඟා කතාබස් කරන්න
  • කාමරය තුළට ආලෝකය හොඳින් ලැඛෙන සේ ජනෙල් හැර තිර රෙදි විවර කරන්න
රාත්‍රි කාලයේදී

  • කිරි බී කුස පිරුණු ඉක්මණින් ඇඳ මත තබන්න
  • ශබ්ද ඇති කිරීමෙන් වළකින්න
  • අඩු එළියක් සහිත විදුලි බුබුළු භාවිත කරන්න
  • යම් සංයමයකින් යුතුව කතාබස් කරන්න
  • දරුවා සමග සේලලම් කිරීමෙන් වළකින්න

දරුවා රාත්‍රියට නින්දට සූදානම් කිරීම මගින් ඔවුන් ක්‍රමයෙන් වැඩෙන විට ඉබේම හුරුව ඇති කරගැනීමට පෙළඹේ.

මවක් ලෙස ඒ සඳහා යම් විධි ක්‍රම භාවිත කිරීමේ හැකියාව ඔබ සතුව පවතී. දරුවා සේදීම මගින් දරුවාට සෞම්‍ය බවක් ලැබේ. එය දරුවාගේ නින්දට රුකුල් දීමකි. එමෙන්ම ලයාන්විත නැළවිලි ගීයක් මිමිණීම, දරුවාට කතාන්දරයක් කියා දීම වැනි ක්‍රියාකාරකම් තුළින් දරුවා නිසි වේලාවට නිදි කරවීමට හැකියාව ඇත.

සමහරවිට මෙලෙස සුදානම් කළද දරුවා නිදා නොගන්නා අවස්ථා දක්නට ලැබේ. නමුත් නොකඩවා මෙම ක්‍රමය අනුගමනය කිරීමෙන් ටික දිනක් යාමේදී දරුවාට නිසි අයුරින් නින්දක් ලබාගැනීමට හුරුවක් ලැබේ. දරුවන් එකිනෙකකාට නින්දෙහි අවශ්‍යතාවය වෙනස් වන අතර නිදාගැනීමේ රටාවද වෙනස් වේ. එමෙන්ම එක් එක් වයස් කාණ්ඩ සඳහා නින්ද අවශ්‍ය වන ප්‍රමාණයද වෙනස් වෙයි.

අලූත උපන් දරුවා අවදිව සිටින කාලයට වඩා නිදාගෙන සිටින කාලය වැඩිවන අතර බොහෝ විට පැය 8-16 දක්වා කාලයක් දිනකට නිදාගනී.

මාස 3-6 අතර දරුවා ක්‍රමයෙන් වැඩෙන විට රාත්‍රි කාලයේ කිරි දිය යුතු වාර ගණන ක්‍රමයෙන් අඩුවේ. සමහර දරුවන්ට රාත්‍රී කාලය තුළ පැය 8 ක් හෝ ඊට වඩා වැඩි කාලයක් නිදාගත හැකි වුවත් සමහර දරුවන් එලෙස නිදා නොගනී. සාමාන්‍යයෙන් මාස 4 ක් පමණ ගත වන විට දහවල් කාලය තුළ නිදාගන්නා කාලය මෙන් දෙගුණයක් රාත්‍රි කාලය තුළ නිදාගනී.

මාස 6-12 අතර දරුවා රාත්‍රී කාලය තුළ කිරි බීම අඩු අතර පැය 12 ක පමණ නින්දක් ලබයි. දත් ඒම, කුසගින්න වැනි තත්ත්ව නිසා රාත්‍රියේදී අවදිවිය හැකියි. කෙසේ වෙතත් දරුවන්ගේ නින්ද දරුවන්ට අත්‍යවශ්‍ය වන නිසා දරුවන්ට ප්‍රමාණවත් නින්දක් ලැඛෙන්නේ දැයි විමසිලිමත් විය යුතුය.

බුලත්සිංහල, සෞඛ්‍යය වෛද්‍ය නිළධාරී කාර්යාලයේ පවුල් සෞඛ්‍යය සේවා නිළධාරිනි අයිරාංගනි ගගලගමුව මහත්මිය සමග සකසන ලද ලිපියකි.  

 

LEAVE A REPLY

SUBSCRIBE කරන්න ⇢

165,796FansLike
12,900SubscribersSubscribe
- Advertisement -
- Advertisement -

More article