කොහාගේ නාදය සහ ගස් අතු පතර දිලිසනෙ එරබදු මල් අද දැක ගන්නට නොමැති වුනත් සිංහල අලුත් අවුරුද්ද පිළිබඳ සංකල්පය අපේ හිතෙන් තවමත් ඈත් වෙලා නැහැ. ඒත් සමහර මව් දෙමව්පියන් සිංහල අලුත් අවුරුද්දේ සංස්කෘතික වටිනාකම ගැන බොහොම ගොරෝසු විදිහට හිතනවා. අවුරුද්ද කියන්නේ සල්ලි විනාශ කිරීමක්…සිංහල අලුත් අවුරුද්ද කියන්නේ කැලැන්ඩරයේ එක දවසක් විතරයි. මේ වගේ අනවශ්‍ය තර්ක විතර්ක නගමින් සිංහල අලුත් අවුරුදු සමග බැඳුන යුතුකම් සහ වගකීම්වලින් බොහොම අපූරු විදිහට නිදහස් වෙන්න බලනවා. ඒත් සිංහල අලුත් අවුරුද්ද දරුවන්ගේ ලෝකයට ලබා දෙන්නේ අපූරු වින්දනයක්. මාර්ටින් වික්‍රමසිංහ මහතාගේ පොත් පත් කියවන විට එදා සිංහල අලුත් අවුරුද්ද තුළ දරුවන් ලද චමත්කාරය ගැන වින්දනාත්මක තෘප්තියක් අපටත් ලබා ගත හැකියි.
කජු ගස් , එරබදු මල් නැතැත් අදටත් දරුවන්ගේ ලෝකයට අවුදරුදු සිරිය ලබා දීම ඉතා වැදගත් සිංහල අලුත් අවුරුද්ද වචනයේ පරිසමාපත්තියන්ම අලුත් බවක් අපිට ඇති වෙනවා. එකාකාර ජීවන රටාවෙන් මිදුන කිසියම් වෙනසක් දරුවන්ගේ හිත්වලටත් මෝදු වෙන්න මේ කාලය ඉතාම උචිතයි. අවුරුද්ද වෙනුවෙන් හැම දෙනාම එකම විදිහිට සැරසෙන විට ඔබේ දරුවන්ටත් ඒ අත්දැකීම ලබා දෙන්න අවශ්‍යයි. අවුරුද්දේ ඉතාම සුන්දර වෙන්නේ පෙර සූදානමයි.
සිංහල අලුත් අවුරුද්දට පෙරාතුව එදා වගේ ගොම මැටි නොගෑවත් අදටත් අපි නිවස පිරිසිදු කරනවා. මේ කටයුතු නිසා නිවසට ලැබෙන ආලෝකය සුලුපටු නැහැ.ඒ වගේම නිවස පිරිසිදු කිරීම නිසා දරුවාත් ඒ කටයුතුවලට සම්බන්ධ වෙනවා. තෙල් තාච්චියක් අනිවාර්යෙන් ලිප තිබ්බේ නැත්නම් නිවසට සිරියාවක් නැතැයි වූ කතා බහ එදා ගොඩ නැගුනා. අදට නම් නිවසේ කැවිලි පෙවිලි සකස් නොවුනත් අවුරුදු මේසයට පමණක්වත් කැවිලි සූදානම් කරනවා. මේ කටයුතු දරුවන්ට ඉතා විනෝදජනකයි. කෙහෙල්කැන් ඉදවන්න අද වගේ කාබයිට් නැති යුගයක කෙහෙල්කැන්වලට දුම් ගැහුවේ රංචු පිටින් දරුවන් එකතු වෙලා. අදටත් කෙහෙල්කැන් ඉදවන කටයුතු වෙනුවෙන් දරුවන් විවිධ විදිහට යොමු කරන්න පුළුවන්. වස විස නැති ආහාර පිලිබඳ සංකල්ප ඔවුන්ගේ හිත්වලටත් නෙදැනම ඇතුළු වෙනවා.
සිංහල අලුත් අවුරුදු චාරිත්‍ර ගැන දරුවන් දැණුවත් කිරීම අවශ්‍යයි. අද පවුලක් වුනාට ඒ පවුල පවුල තුලම විතැන් වෙලා. අම්මා , තාත්තා දරුවන් එකම වෙලාවක , එකම මේසයක ආහාර ගැනීමක් ඇත්තේම නැහැ. අවුරුදු සිරිත් අනුව ලිප ගිනි මෙලවීම, ගණුදෙණු කිරීම හා වැඩ ඇල්ලීම ආහාර අනුභවය , හිසතෙල් ගා ස්නානය සහ රැකීරක්ෂාවන්ට පිටත්වීමට නියමිති නැකත් තිබෙනවා. මේ නිසා පවුලක් තුළ එකම වේලාවක , එකට එකතුව කටයුතු කිරීමේ ගති පුරුදු ගොඩ නැගෙනවා.
අද බොහෝ දෙනා නගන චෝදනාව අපි අතර යුතුකම් පාර්ශවය බොහොම සීඝ්‍රයෙන් පිරිහෙන බවයි. සිංහල අලුත් අවුරුද්ද මේ චෝදනාවන්ගෙන් නිදහස් වෙන්න නොව මේ ගති සිරිත් වගා කර ගන්න අවස්ථාව සලසා දෙනවා.
ගමෙන් දුරස්ථව සිටින දරුවන් මව්පියන් දැක බලා ගෙන ඔවුන්ගෙන් ආශිර්වාද ලබා ගන්නවා. බුලත් දුංකොල දී ඔවුන්ට නමස්කාර කරනවා. ගමේ පන්සලේ ස්වාමින්වහන්සේලා හමුවට ගොස් සෙත් පිරිත් ආශිර්වාද ලබා ගන්නවා. අද නම් සමාජයේ එකමුතු බව බොහෝ සෙයින් ඈත්ව ගොසින්. අතීතයේදී ගමේ ගොඩේ පවුල් අතර ඇති වෙන පුංචි පුංචි නෝක්කාඩු හිත් සිංහල අලුත් අවුරුද්දට නැති කරගෙන එකමුතු වුණා. අදට නම් ඒ වගේ ගති පුරුදු නැති වුනත් දරුවන්ට මේ බව පහදා දෙන්න. ඔවුන්ගේ හිත් සාමකාමී කිරීමට ගැලපෙනම කාලය සිංහල අලුත් අවුරුද්දයි. නෑදෑකම් අලුත් කර ගන්න, දුරස්ථව ගිය හිත් නැවත සමීප කරගන්න මේ කාලයේදී පුලුවන්.
ගණුදෙනු කරන නැකතට දරුවාටත් පොත පත සමග රැ‍ෙඳෙන්නනට උපදෙස් දෙන්න. සුබ මුහුර්තියට කටයුතු කරන විට අධයාපනය සුබදායක ලෙසින් ඉදිරියට කර ගෙන යා හැකි බව ඔවුන්ට පහදා දෙන්න. වැඩ අල්ලන නැකතට එදා වගේ කිරි ගසට කොටන්නනට, කැත්ත උදැල්ල අතට ගන්නට නොමැති වුනත් පාසලේ පොත් පත් අරගෙන මුලින්ම ” ස්වස්ති සිද්ධම් ” යන වගන්තිය සටහන් කිරීමට උපදෙස් දෙන්න. මේ නිසා ඇති වෙන මානසික අලුත්බව දරුවාගේ ඉදිරි වාරයට අලුත් ජවයක් ලබා දෙනු ඇත.
හිස තෙල් ගාන නැකතට පන්සලට ගොස් හිස තෙල් ගල්වා ගෙන ආශිර්වාද ලබා ගන්න. ආගමික හුරු පුරුදු මගින් දරුවාගේ ජීවිතයට ලැබෙන ශක්තීන්ද පවතින බව පහදා දෙන්න. බුද්ධියෙන් ඉහල ගියත් මානසිකව ශාන්තිය ලබා ගැනීමට නම් අපි ආගම දහම සමග සම්බන්ධ වීම අවශ්‍යයි. කිසිම දවසක මේවා බැහැර කලොත් මානසිකව සහනශීලිත්වයක් ලබා ගැනීම අපහසුයි.
රැකීරක්ෂාවන්ට වැඩිහිටියන් පිටත්ව යන පරිද දරුවන්ටත් පාසල පටන් ගන්නා දිනයක් අලුත් අවුරුද්දට පසුව එළැඹෙනු ඇත. එදිනටත් දරුවාගේ මනස අලුත් වෙන පරිදි පාසල් අධ්‍යාපනයට යොමු කරන්න. නව පාසල් වාරයට අලුත් ඇඳුමක් ලබා දෙන්න. සිංහල අලුත් අවුරුද්දට ඇඳුම් පැලඳුම් මිලට ගන්නා විට ඒ ගැනත් සිතීම අවහ්‍ය වේ. නව වාරයට පෙර දිනයේ පන්සලට හෝ අදාල ආගමික කටයුත- කරන ස්ථානයකට කැඳවා ගෙන ගොස් ආගමික ආහිර්වාද ලබා දෙන්න. දරුවාගේ මානසිකත්වය නවාවයකින් පන ලබන්නේ එවිටය. මට මේ වාරයේ වැඩ කටයුතු හොඳින් කර ගෙන යා හැකිය යන විශ්වාසය ඔවුන්ගේ හිතේ ගොඩ නැගෙනු ඇත. මේ කටවුතු වෙනුවෙන් අමතර වැය ශිර්ඹ්‍ෂයක් අවශ්‍ය නැත සිංහල අලුත් අවුරුද‍‍්‍සමග දරුවාගේ අදයාපනයටක් අලුත් බවක්ලබා දෙන්න.
අවුරුද්ද ගෙවුන තැන අපි නැවතත් අලුත් දිනයක් වෙනුවෙන් යොමු වීම සාමාන්‍ය සංසිද්ධියයි. මේ වෙනුවෙන් නව බලාපොරොත්තු ගොඩ නගා ගැනීමට උපදෙස් ලබා දෙන්න. අපේ ජීවිත ජීවත් කරන්නේ බලාපොරොත්තුවයි. දරුවන්ටත් ඒ සංකල්පය ගොඩ නගන්න. බලාපොරොත්තු ඉෂ්ට සිද්ධ කර ගැනීමේ මාර්ග සලසා ගෙන ඒ අරමුණු ඉලක්ක වෙත යන්නට අවශ්‍ය ධෛර්ය ශක්තිය ලබා ගැනීමට සිංහල අලුත් අවුරුද්ද අලුත් විදිහට බුත්ති විඳින්නට දරුවන්ට ඇවැසි මග දෙමවිපියන් වශයෙන් සලසා දෙන්න. අද වැඩිහිටියන් සේ සිටින උදවිය අතීතයේ අවුරුදු සිරිය ගැන කතා බහ කරන්නේ ඔවුන් ලද අපූර්ව වූ අත්දැකීම නිසාය. අනාගතයේදී ඔබේ දරුවාටත් සිංහල අලුත් අවුරුද්ද වෙනුවෙන් අද දවස පාදක කරගෙන ලබන අත්දැකීමෙන් හෙට දිනයට කුමන හෝ රසවත් මිහිරක් ඉතිරි වෙනු ඇත. ඒ අවස්ථාව වෙනුවෙන් ඔවුන්ට සිටින එකම පෙර මග ගමන්කරුවා ඔබය.
